الشكية لي الله

الحب جميل رفيق المضبات الضيقة والشوارع المظلمة
الحب متعة الحياة
الزول لمن يحب بحس بشنو
بحس بحاحات كتارات كده ما بتتوصف بخليك محلق فوق فوق ده لو ما بقاك زول طيرة ساكت
الحب احساس ونعمة وسعادة لا توصف
لكن كتر خير الشاكوش ما بقصر دائما بصقل الحب باجمل المسامير القلاووز
وبخليك مربوط بزكريات اصلو ما بتتفك منك تكون بس معلق بمسمار بين الماضي والحاضر

تقعد تحلم بعالم جميل عالم خالي من كل اشكال التعليقات
حتي الكمبيوتر مرات لما تكون مستمتع وشغال فيهو بمزاج يقعد يسوي في حركات ويعلق
ومرات تكون بتكتب في موضوع ولا بترد بمزاج فجأة تقوم الصفحة تعلق
ومرات كتيرة يعجبك موضوع تكون عايز تعلق تلقي العبرة معلقة في حلقك بتعلق لكن بصمت
لكن تعليق مسمار صديقي الشاكوش دائما هو سيد التعليقات كلها
لانو بخليك معلق بين السماء والارض

الحياة دي في نظري شئ غريب بحسها زي الكائن الدخيل علي عالمي
مرات بتبقي شئ ما مفهوم مرة تنسيك نار جهنم ومرات تزيد عليك الهموم
الواحد بقي زي المنتظر حياة جديدة حياة خالية من كل اشكال ..........و........و..........الخ
المصيبة الحياة الجديدة بتكون بعد تموت
وتموت احلامك وآمالك ويخيب ظنك وتشوف كل شئ اسود اسود اسود
بس برضو بقول املنا في حياة جديدة حياة الزول فيها يكون مرتاح وبس
التعب كعب خصوصا لما يكون في شئ ما بستاهل
والشئ المؤسف بتتعب غصبا عنك وبدون ارادتك
يعني انا بتعب ليه وبرهق روحي ليه وبجني علي جسدي ليه ياربي الكلام ده بدخل الجنة ولا بجلب السعادة
هسه انا بسمع في اكون Akon - Right now
مستمتع للاخر بس تعبت من جلسة الكمبيوتر
يعني حتي عشان تكون سعيد سعادة موقتة لازم تتعب تعب جسيم
تعاني عشان الكل يستمتع ولما تسعد الناس بتكون ارهقتها لانها بتكون عانت وهي بتستمتع
معادلة الاستمتاع والتعب زي
1 + 1 = 1
شئ ما منطقي
لانه مبدأ الحياة عندي غير منطقي